Extrait de Fleûrs di m' Bouquèt, Melreux, 1956
Lès Mohes al lame
Li piquète di l'êreûre va visiter l'moh'lîre
Po lès p'titès bawètes, là qu'dwème tot-in'-empîre
Et l'djoû fait l'guére al nut' po tchèssî foû dès tchamps
L'âbion qu'a st-èssok'té l'nateûre divins sès tchants.
Esbarêyes dèl clarté qui vint dèl zî sorîre,
Lès mohes, totes à cowêye, abrotchèt d'leû mâhîre,
So l'timps qu'â lon, l'solo clign'têye l'air soriyant,
A d'triviès dè fouyèdje, dès vis plopes adjèyants.
Eles toûrnikèt 'ne miète atoû di leû bèdrèye,
Tot grusînant st-èssonle leû tchanson d'â matin,
Puis ll'si diskimèlèt : vont nahî lès djardins
Tot voltant d'fleûr à fleûr po tèter leûs soukrèyes...
Et qwand-elle ont leû tchèdje, èles rintrèt st-è l'apî
Afîz' de r'mète à pont çou qu'èlle ont raskoyî !
Eles n'inmèt nin lès nawes, ces vigreûsès ovrîres :
E leû r'mouwànt pays, n'a nole qui vique rintîre,
Chaque mohe a s'dake à fé, li rinne èst leû k'mandant ;
Elle ont st-on réglumint qu'èles si d'vèt ployî d'vant.
Louquîz bin cisse volêye s'ènonder vès l'brouhîre :
C'èst ine binde di maneûves tchèrdjèye dè kwèri l'cîre,
Dismètant qu'èl tchèteûte, dès-autes, sins s'chèrvi d'plan,
Bâtihèt st-à chaskeune, on lodjisse tos lès-ans.
Vèyez-v' ciste aûte brigâde qui voltêye èl praîrèye?...
Ele deût kwèri l'magn'hon po lès-ovrîres d'âdvins
Qui n'polèt nin qwiter l'bèsogne dè bâtumint...
Eles nos mostrèt l'èximpe de l'siyince, di l'industrèye,
Di l'amoûr po l'ovrèdje, dè l'façon dè spârgnî...
« Kibin d'omes, adlé zèles, pôrît-èsse raksègnî?... »
Commentaires