Site d'Adrien Daxhelet

Site d'Adrien Daxhelet

  • Augmenter la taille de police
  • Taille de police par défaut
  • Diminuer la taille de police
Site optimisé pour le navigateur Firefox

Beûre

Envoyer Imprimer

Extrait de Fleûrs di m' Bouquèt, Melreux, 1956

 

Beûre

(L'ovrî al vonne)

 

E brouliârd di poûssîre qu'èl sèfoque à mwètèy',
Bagnî d' souweûr à fwèce d'ovrer di sès pus reûds,
A pîce so quéque grêye bwès, co pus franc qu'on hayeteû
On l'ôt djèmi chaque côp qu'i fîre avou l'ustèye. .
Heun ! heun ! heun !... li hoye tome... arôle foû de vî-tiér ;
Li payèle est bin deûre, mins sès deûs brès' sont d' fier ;
Avou s' corèdje di dj'vâ, s' djoûrnêye sèrè vite houte
Et là, dizos l' neûr cîr dèl contrêye â tchèrbon,
N'âyant po tot solo qu'ine loum'rote â coton,
Il oûveûre sins t'ni compte dè laid teût qui l'ahoute...
Ah ! savez-v' bin poqwè qu'i n' s'astǻdje nin voltî,
Qu'i n' prind qu'a hipe li timps dè magnî s' bokè d' tâte,
C'èst qui dè plafond d' pîre, l'êwe aspritche po 'ne hirǻte
Et qui foû dès crouweûrs, il a hǻse di s' winnî.
Hoûtez lès côps d' havrèsse pingn'ter sins nole ahote,
Et s'i r'çût d' timps-in-timps so sès pognes ine gougnote,
I djeûre on p'tit sètch' côp sins s'arèster d'ovrer,
Ou bin sacrâmèn'têye afîze di s'consoler...
Mins, quéques mètes èrî d'lu, vola qu' tot-à-fait hèye.
I s' veut pris divins 'ne trape fî parèye qu'ine soris ;
Si l'mâleûr èn-î vout, qui don l' vinrè r'kwèri :
Nin 'ne seûle âme avâ là po-z-ètinde sès brêrèyes !
C'èst qui d'vins 'n'èmont'mint, n'a qu'ine pièce po s'sâver,
Asteûre, tot s' va rimpli là wice qu'i deût r'passer
Et lu qu'èst si hǻrdi, mowe èt tronle come ine foye...
- Vola qu'i hèye pus fwért... - I d'vint st-à tchâr di poye.
Sès-oûy's si mouyèt d' lǻmes, i tûse à sès-èfants
Qui corèt d'zos l' bleû cîr, sins mǻs d' tièsse, bin pwertants ;
Etindrè-t-i co mǻy' leûs vwès si carèssantes?...
Riveûrè-t-i co s' feume, si p'tite djîse assètchante ?...
Adiè, bê solo d' may', adiè paûves-ôrfulins!...
Et là d'vins l' trisse nutêye, i soglote on moumint...
Mins, tot rid'vint pâhûle : pus rin n' tome dèl hiyeûre ;
Sayî dè passer houte!... âh ! c'est bin risquer s' cwérp :
I n' fǻt nin 'ne si grosse pîre po v's-èl bouhî reûd-mwért ;
Anfin, djan ! qwite ou dobe... I passe sins s' fé 'ne akseûre !
On gros sospîr s'èlîve foû di s' coûr pawoureûs.
Pwis r'gangne li beûre rat'mint... Divins quéquès munutes
Li gayoûle èl sètch'rè foû d' ciste èwarante nut'...
Anfin, volchal â djoû... Li cîr est d'on bê bleû ;
Tot-à-fait lî sorèy' et lî r'done di l'aweûre,
L'air kissèmé d'èssince, trivièse lès tchamps d' vèrdeûre,
Ine âlouwète gazoye là d'zeû lès prés floris ;
A lu, l' tére si présinte come on vrêy' paradis...
Et, r'vèyant cès bêtés, nosse paûve houyeû roûvèye
Qu'ine dimêye eûre divant, i mâqua d'piède li vèye

 

Commentaires

Afficher/cacher le formulaire SVP, identifiez-vous pour poster des commentaires ou des réponses.
 

Identification

Cette identification vaut pour tout sauf pour la galerie de photos qui a sa propre identification