Site d'Adrien Daxhelet

Site d'Adrien Daxhelet

  • Augmenter la taille de police
  • Taille de police par défaut
  • Diminuer la taille de police
Site optimisé pour le navigateur Firefox

Li Houyeû

Envoyer Imprimer

Extrait de Fleûrs di m' Bouquèt, Melreux, 1956

Li Houyeû

Air : Où vas-tu ?...

 

I
Divins lès dandjîs dè neûr trô parfond,
Wice qui l' bê solo n'a mây' vèyou l' fond,
Li houyeû,
Afiz' dè gangnî po noûri s' niyêye,
Tot l' timps di s' cârîre, i fât qu'i s' risquêye :
I deût todi r'crainte qu'on côp d'êwe ou l' feû,
Ni l'èspêtche, on djoû, dè r'vèy' li çîr bleu ;
Et rin qu' d'î sondjî, mâgré lu, s' coûr sonne,
Volà totes sès ponnes !

II
S'il ès't-on pô vif, s'il a l' parlé franc,
Po s' chère kipagnèye èt po sès èfants,
Li houyeû,
A bêcôp d'amoûr èt dèl bonté d'âme,
Por zèls, tot fin dreût, sès oûy's ont dès lâmes ;
I trouve po cès-là dès mots pleins d' doûçeûr,
I n' riclame qui zèls âs moumints d' mâleûr...
Et d' lès carèssî, qwand il est rèvôye,
Volà tote si djôye !

III
D'èsse fîr di s' corèdje, hâtain d'èsse hârdi,
Si vite foû dèl fosse wice qu'i s'a nanti,
Li houyeû,
A bon dè fé k'nohe à sès camarâdes
Sès ponnes dèl djoûrnêye èt sès astrapâdes ;
Si pus grande oneûr, c'èst d' dire qu'il a fait
Divins 'ne dandj'reuse tèye, li pus deûr pairê ;
I s' vante di çoula come d'ine grande victwére...
Volà tote si glwére !

IV
Lès gâz, lès poûssîres, oûy' ont raison d' lu,
Li coûtrèsse d'alêne l'a v'nou bouhî dju...
Paûve houyeû !
Lu qu'a d'vou passer dès deûrès annêyes,
I fât qu' lanwihe co!... Quéle trisse dèstinêye :
I ponne po viker, sofrihe po mori
Disqu'â djoû qui l' mwért l'âye vinou kwèri
Po l' rid'hinde è tére po n' mây' pus l' rivèy'...
Volà tote si vèye !

 

Commentaires

Afficher/cacher le formulaire SVP, identifiez-vous pour poster des commentaires ou des réponses.
Mise à jour le Vendredi, 16 Janvier 2009 18:59  

Identification

Cette identification vaut pour tout sauf pour la galerie de photos qui a sa propre identification