Extrait de Fleûrs di m' Bouquèt, Melreux, 1956
Wice ès't-i ?...
Air : Le petit Grégoire.
I
N'aveût qwatre ans qu' dj'èsteûs mariêye,
Qwand l' guère èclata ;
Mi pauvre ome qu'èsteût d' l'ârmêye, ,
Po r'jonde, mi qwita.
Dji n'a r'çû qu'ine seûle novèle,
Dispôy'qu'on m'l'a pris ;
Çoula m' fait sogne èt m' troûbèle...
Mon Diu, wice ès't-i m' ch'r Louwis ?
Mon Diu, r'vinrè-t-i d'lé mi?...
II
Po roûvî m' ponne, si dj'risquêye
Dè voleur tchanter,
E m' gozî m' vwès s'arèstêye
Po m' lèyî plorer.
Si dji m' vous mète à l'ovrèdje,
Po k'tchèssî m' displi,
Dji sins qu' dji n'a pus l' corèdje...
Mon Diu, wice ès't-i m' chér Louwis ?
Mon Diu ! r'vinrè-t-i d'lé mi ?
III
Qwand dj'ètinds l' canon qui tone,
Dji m' mète à tronler
Et, come ine transe, mi coûr sone
Po l' ci qu' m'a qwité.
Dji sospîre : i moûrt quéqu'fèy'
Dizos l' feû d'I'inn'mi !
Et, por lu, dj' rabrèsse nosse fèye...
Mon Diu, wice ès't-i m' chér Louwis ?
Mon Diu ! r'vinrè-t-i d'lé mi ?
IV
Divant-z-îr, nosse paûve pitite,
Tote trisse mi d'manda :
« Mame, èst-ce qui dji r'veûrè vite
Mi mamé papa ?
On dit qu' l'ès't-èvôye al guère
Po n' mây' pus riv'ni,
Sèreût-i vrêy', pitite mère?...
Mon Diu, wice ès't-i m' chèr Louwis ?
Mon Diu ! r'vinrè-t-i d'lé mi ?
V
A plorer, dj' sos st-aviyèye
Di co pus d' dîh' ans ;
Si dj'a l' boneûr dèl rivèy',
M'inm'rè-t-i co tant ?
Dj'î sondje tofér èt m' coûr sonne,
Dji m' dimande todi :
Çou qu' l'av'nîr mi wâde di ponne ?...
Mon Diu, wice ès't-i m' chér Louwis ?
Mon Diu ! r'vinrè-t-i d'lé mi ?
Commentaires